काठमाडौं महानगरपालिकाका नगर प्रहरीलाई निर्मल निवासको गेटबाटै फर्काइएको छ।
पत्र नबुझ्ने भन्दै निर्मल निवासले गेटबाटै नगर प्रहरीलाई फिर्ता पठाएको हो।
चैत १५ गते तीनकुने क्षेत्रमा प्रदर्शन र तोडफोडका क्रममा क्षति पुगेको भन्दै महानगरले पूर्व राजा ज्ञानेन्द्र शाहका नाममा ८ वटा पत्र काट्दै ७ लाख ९३ हजार जरिवाना तोकेको थियो।
जरिवाना तोकेको उक्त पत्र निर्मल निवासमा बुझाउन गएको नगर प्रहरीलाई गेटबाटै फिर्ता पठाइदिएपछि अब हुलाकबाट पत्र पठाउने तयारीमा महानगर छ।
आइतबार नगर प्रहरी पूर्णचन्द्र भट्टको नेतृत्वमा पत्र बुझाउन पुगेको महानगर प्रहरीलाई निर्मल निवासको गेटबाटै फिर्ता पठाइएको थियो।
पत्र बुझाउन पुगेका नगर प्रहरीलाई पत्र बुझ्दैनौं भन्दै गेटबाटै फिर्ता पठाएको नगर प्रहरी उपरीक्षक दिनेश अर्यालले जानकारी दिए। 'पत्र बुझाउन पुगेको हाम्रो टोलीलाई हामी पत्र लिदैनौं भनेर निर्मल निवास गेटबाटै फर्काइएको छ,' उनले भने, 'अहिले हुलाकमार्फत जरिवाना गरिएको पत्र पठाउने तयारी गर्दैछौं।'
महानगरले शुक्रबार तीनकुने क्षेत्रको प्रदर्शनमा तोडफोड र फोहोर गरेकोलगायत विभिन्न शीर्षकमा पूर्वराजा शाहलाई जरिवाना तोकेको थियो।
दुर्गा प्रसाईंको आह्वानमा राजसंस्था पुनर्स्थापनाका लागि भन्दै शुक्रबार तीनकुने क्षेत्रमा प्रदर्शन भएको थियो।
बिहीबार प्रसाईंले निर्मल निवास पुगेर पूर्वराजालाई भेटेका थिए। त्यसलगत्तै उनलाई राजसंस्था पुनर्स्थापनाका लागि भन्दै कमाण्डर तोकिएको थियो।
राजावादी प्रदर्शनकारीहरूले प्रहरी घेरा तोड्न पटक-पटक प्रयास गरेका थिए। पछि प्रसाईंले प्रहरीलाई पेलेर गाडी चलाउँदै प्रहरी घेरा तोडेर निषेधित क्षेत्र प्रवेश गरेका थिए।
प्रसाईंसँगै प्रदर्शनकारीहरूले पनि प्रहरी घेरा तोडेपछि तितरबितर बनाउन प्रहरीले अश्रुग्यास प्रहार गरेको थियो। त्यसपछि प्रदर्शनकारीहरूले निजी घरमा तोडफोड र आगजनी गरेका थिए।
आगो निभाउन गएको काठमाडौं महानगरको दमकललाई पनि ढुंगा प्रहार गरेका थिए।
प्रदर्शनकारीहरूले महानगरका विभिन्न संरचना, दमकल, अग्नि नियन्त्रकहरूमाथि प्रहार गरेकोमा महानगरले पूर्वराजा शाहलाई जरिवाना लगाउने निर्णय गरेको हो।
शनिबार काठमाडौं महानगरपालिकाको टोलीले तीनकुने-कोटेश्वर-जडिबुटी क्षेत्रमा भएको क्षतिको विवरण संकलन गरेको थियो। उक्त विवरण संकलन गरी लाग्ने खर्च र सरसफाइको शुल्क पनि पूर्वराजा शाहबाटै असुल गराउने निर्णय भएको हो।
तीनकुने क्षेत्रमा शुक्रबार दुई जनाको मृत्यु भएको थियो।
प्रदर्शनकारीहरूले पार्टी कार्यालय, निजी घर, सुपरमार्केट, सञ्चार गृह, जडिबटी प्रशोधन केन्द्र र सरकारी गाडीमा आगजनी गरेका थिए।
प्रसाईंले आह्वान गरेको प्रदर्शनलाई नवराज सुवेदी नेतृत्वको 'राजसंस्था पुनर्स्थापना संयुक्त जनआन्दोलन समिति', राप्रपा र राप्रपा नेपालले पनि समर्थन जनाएका थिए।
शुक्रबारको घटनापछि प्रसाईं फरार छन्। प्रदर्शनमा पुगेका 'राजसंस्था पुनर्स्थापना संयुक्त जनआन्दोलन समिति' का सदस्य सचिव राप्रपा वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणालाई शुक्रबार साँझ प्रहरीले पक्राउ गरेको थियो।
फागुन २५ गते पूर्वराजा ज्ञानेन्द्र शाह पोखराबाट काठमाडौं आउँदा त्रिभुवन विमानस्थलदेखि स्वागत र प्रदर्शनका क्रममा फोहोर र महानगरका संरचनामा क्षति पुर्याएकोमा राप्रपालाई एक लाख रुपैयाँ जरिवाना तोकेको थियो। सांसद ज्ञानेन्द्र शाहीले महानगरमा पुगेर जरिवाना तिरेका थिए।
त्यसअघि महानगरले दरबारमार्गमा कार्यक्रम गरेको नेकपा (एमाले) लाई पनि एक लाख रुपैयाँ जरिवाना तोकेको थियो।
